300 ಹಲಸು ತಳಿ ಸಂರಕ್ಷಿಸಿದ ಮಲೆನಾಡ ಕೃಷಿಕ ನರೇಂದ್ರರ ಸಾಧನೆ

ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲೂಕಿನ ಬೇಳೂರಿನ ಬಿ. ಟಿ. ನರೇಂದ್ರ ಎಂಬ 73 ವರ್ಷದ ಕೃಷಿಕರ ಸಾಧನೆ ಹಲಸಿನ ಲೋಕದಲ್ಲಿ ಹೊಸ ಮೈಲಿಗಲ್ಲು ಸೃಷ್ಟಿಸಿದೆ. ಯಾವುದೇ ಸರ್ಕಾರಿ ಅನುದಾನದ ಸಹಾಯವಿಲ್ಲದೆ, ತಮ್ಮ ಸ್ವಂತ ಆಸಕ್ತಿಯಿಂದ ನಾಲ್ಕೂವರೆ ಎಕರೆ ಜಾಗದಲ್ಲಿ ಬರೋಬ್ಬರಿ 300 ಹಲಸು ತಳಿಗಳನ್ನು ಬೆಳೆಸಿ ಸಂರಕ್ಷಿಸುತ್ತಿದ್ದಾರೆ. ಅವರ ಈ ಅಸಾಮಾನ್ಯ ಕಾರ್ಯ ದೇಶಮಟ್ಟದಲ್ಲಿ ಗಮನ ಸೆಳೆಯುವಂತಿದೆ.

ಸರಳ ಉಡುಪಿನ, ಹಸನ್ಮುಖಿ ನರೇಂದ್ರರು ತಮ್ಮ ತೋಟದಲ್ಲಿ ಹಲಸಿನ ಗಿಡಗಳಿಗೆ ಕಸಿ ಕಟ್ಟುವುದರಲ್ಲಿ ನಿರತರಾಗಿದ್ದಾಗ ನಾನು ಅವರನ್ನು ಭೇಟಿಯಾದೆ. ಅವರ ಉತ್ಸಾಹ ಮತ್ತು ಹಲಸಿನ ಮೇಲಿನ ಪ್ರೀತಿ ಅಚ್ಚರಿ ಮೂಡಿಸಿತು. ಹಲಸು ತಳಿಗಳನ್ನು ಸಂಗ್ರಹಿಸುವ ಅವರ ಕಥೆ ಅಡಿಕೆ ತೋಟಕ್ಕೆ ಸೊಪ್ಪಿನ ಹುಡುಕಾಟದಿಂದ ಆರಂಭವಾಗಿತ್ತು. ಪತ್ನಿಯ ಸಲಹೆಯಂತೆ ಹಲಸು ಬೆಳೆಯಲು ಮುಂದಾದಾಗ, ಮೊಲಗಳ ಕಾಟದಿಂದ ನಷ್ಟ ಅನುಭವಿಸಿದ ನಂತರ, ಕಸಿ ಗಿಡಗಳನ್ನು ನೆಡುವತ್ತ ಗಮನ ಹರಿಸಿದರು. ಇದು ದೇಶ-ವಿದೇಶಗಳ ಉತ್ತಮ ತಳಿಗಳನ್ನು ಸಂಗ್ರಹಿಸುವ ತುಡಿತಕ್ಕೆ ಕಾರಣವಾಯಿತು.

ಪ್ರಸ್ತುತ ನರೇಂದ್ರರ ತೋಟದಲ್ಲಿ 300 ಹಲಸು ತಳಿಗಳ 680 ಗಿಡಗಳಿವೆ. ಇವುಗಳಲ್ಲಿ ಮಲೇಷಿಯಾ, ಥಾಯ್ಲೆಂಡ್ ಸೇರಿದಂತೆ ಐದಾರು ದೇಶಗಳ ತಳಿಗಳು ಸೇರಿವೆ. ಉಡುಪಿಯ ಕಸಿತಜ್ಞ ಗುರುರಾಜ ಬಾಳ್ತಿಲ್ಲಾಯ ಅವರಿಂದಲೂ ಹಲವು ತಳಿಗಳನ್ನು ಪಡೆದಿದ್ದಾರೆ. ಹದಿನೈದು ಅಡಿಗೊಂದರಂತೆ ತ್ರಿಕೋನ ವಿನ್ಯಾಸದಲ್ಲಿ ಕಸಿ ಗಿಡಗಳನ್ನು ಬೆಳೆಸಿದ್ದು, ಸಾವಯವ ಗೊಬ್ಬರ ಬಳಸಿ, ಕಾಲಕಾಲಕ್ಕೆ ಪ್ರೂನಿಂಗ್ ಮಾಡುತ್ತಾರೆ. ಇಡೀ ತೋಟದ ಹಲಸು ತಳಿಗಳ ನಕ್ಷೆ ಮತ್ತು ಪ್ರಾಥಮಿಕ ದಾಖಲಾತಿಯನ್ನು ಅವರು ಬಹಳ ಅಚ್ಚುಕಟ್ಟಾಗಿ ನಿರ್ವಹಿಸುತ್ತಿದ್ದಾರೆ. ಅಡಿಕೆ ಪ್ರಮುಖ ಬೆಳೆಯಾಗಿರುವ ಈ ಭಾಗದಲ್ಲಿ ಹಲಸನ್ನು ಪ್ರಧಾನವಾಗಿ ಬೆಳೆಸಿರುವುದು ಅವರ ಹಲಸು ಪ್ರೀತಿಯ ದ್ಯೋತಕವಾಗಿದೆ.

ಕಳೆದ ಹತ್ತು ವರ್ಷಗಳಿಂದ ಹಲಸು ತಳಿಗಳ ಸಂಗ್ರಹ ಮತ್ತು ಸಂರಕ್ಷಣೆಯಲ್ಲಿ ತೊಡಗಿರುವ ನರೇಂದ್ರರು, ಇದುವರೆಗೆ ದೊರೆತ ಹಣ್ಣುಗಳನ್ನು ಹಂಚುವುದರಲ್ಲೇ ಸಂತೋಷ ಕಂಡಿದ್ದಾರೆ. ಮುಂದಿನ ದಿನಗಳಲ್ಲಿ ಹಣ್ಣುಗಳ ಮಾರಾಟ ಮತ್ತು ಮೌಲ್ಯವರ್ಧನೆ ಮಾಡುವ ಯೋಜನೆಯನ್ನು ಹೊಂದಿದ್ದಾರೆ. ಮಲೆನಾಡಿಗೆ ಮಂಕಾಳೆ ರೆಡ್, ರುದ್ರಾಕ್ಷಿ ರೆಡ್, ಬೆಳವಾಯಿ ತಳಿಗಳು ಸೂಕ್ತ ಎಂದು ಅವರು ತಿಳಿಸುತ್ತಾರೆ. ಬಯಲು ಸೀಮೆಯ ಸಿದ್ದು, ಶಂಕರ, ತೂಬುಗೆರೆ ತಳಿಗಳು ಇಲ್ಲಿ ತಮ್ಮ ಮೂಲ ರುಚಿಯನ್ನು ಉಳಿಸಿಕೊಳ್ಳುವುದಿಲ್ಲ ಎಂಬುದು ಅವರ ಅನುಭವ. ಇವರಲ್ಲಿರುವ ಎಲ್ಲಾ ತಳಿಗಳು ಗಟ್ಟಿ ತೊಳೆಯ 'ಬಕ್ಕೆ' ವಿಧದವು.

ಕೃಷಿ ವಿಶ್ವವಿದ್ಯಾಲಯಗಳು ಮತ್ತು ಸಂಶೋಧನಾ ಕೇಂದ್ರಗಳು ಮಾಡಬೇಕಾದ ಹಲಸು ತಳಿ ಸಂರಕ್ಷಣೆಯ ಕೆಲಸವನ್ನು ನರೇಂದ್ರರು ಏಕಾಂಗಿಯಾಗಿ ಮಾಡುತ್ತಿದ್ದಾರೆ. ಸಸ್ಯ ತಳಿ ಸಂರಕ್ಷಣೆ ಮತ್ತು ರೈತ ಹಕ್ಕುಗಳ ಪ್ರಾಧಿಕಾರ, ನವದೆಹಲಿಯ 'ಪ್ಲಾಂಟ್ ಜಿನೋಮ್ ಸೇವಿಯರ್' ಪುರಸ್ಕಾರಕ್ಕೆ ಇವರು ಖಂಡಿತಾ ಅರ್ಹರು. ಶಿವಮೊಗ್ಗ ಕೃಷಿ ವಿಶ್ವವಿದ್ಯಾಲಯ ಇವರ ಸಂಗ್ರಹವನ್ನು 'ಹಲಸು ತಳಿ ವೈವಿಧ್ಯದ ಸಂಗ್ರಹಣಾ ತಾಕು' ಎಂದು ಗುರುತಿಸಿ, ಅದರ ನಿರ್ವಹಣೆಗೆ ಅನುದಾನ ಒದಗಿಸಬೇಕು. ಎಲ್ಲಾ ತಳಿಗಳಿಗೆ ಕ್ಯೂಆರ್ ಕೋಡ್ ಲೇಬಲ್‌ಗಳನ್ನು ಹಾಕಿ, ಅವರ ದಾಖಲಾತಿಯನ್ನು ಡಿಜಿಟಲ್ ರೂಪಕ್ಕೆ ತರುವ ತುರ್ತು ಅವಶ್ಯಕತೆಯಿದೆ. ಆಸಕ್ತರು, ಕೃಷಿಕರು, ವಿದ್ಯಾರ್ಥಿಗಳು ಮತ್ತು ಸಂಶೋಧಕರು ಈ ಅನನ್ಯ ಪ್ರಯತ್ನದಿಂದ ಬಹಳಷ್ಟು ಕಲಿಯಬಹುದು.

ನರೇಂದ್ರರ ಮಸ್ತಕದಲ್ಲಿರುವ ಹಲಸಿನ ಕುರಿತಾದ ಅಪೂರ್ವ ಅನುಭವಗಳನ್ನು ದಾಖಲಿಸಿ ಸಮರ್ಪಕವಾಗಿ ಬಳಸಿದರೆ, ಸಮುದಾಯದ ಅಭಿವೃದ್ಧಿಗೆ ಗಣನೀಯ ಕೊಡುಗೆಯಾಗುತ್ತದೆ. ಗ್ರಾಮೀಣ ಭಾರತ ತನ್ನ ಒಡಲೊಳಗೆ ಅದೆಷ್ಟು ಅಚ್ಚರಿಗಳನ್ನು ಇಟ್ಟುಕೊಂಡಿದೆ ಎಂಬುದಕ್ಕೆ ನರೇಂದ್ರರ ಸಾಧನೆ ಉತ್ತಮ ಉದಾಹರಣೆ. ಸರಿಯಾಗಿ ಹುಡುಕಿದರೆ ನಮ್ಮ ನಡುವೆಯೇ ಇಂತಹ ಅನನ್ಯ ಸಾಧಕರು ಮತ್ತು ಅನರ್ಘ್ಯ ರತ್ನಗಳು ಸಿಗುವುದು ಖಚಿತ.