ಸಿಎಂ–ಡಿಸಿಎಂ ಮೇ 26 ದೆಹಲಿ ಭೇಟಿ: ರಾಹುಲ್‌ ಜೊತೆ ಮಾತುಕತೆ, ನಾಯಕತ್ವ ಬದಲಾವಣೆ ನಿರ್ಧಾರ ಬರಲಿದೆಯಾ?

ಕರ್ನಾಟಕ ಕಾಂಗ್ರೆಸ್‌ ರಾಜಕೀಯದಲ್ಲಿ ಇಂದು ದೊಡ್ಡ ಬೆಳವಣಿಗೆ ನಡೆದಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರಿಗೆ ಕಾಂಗ್ರೆಸ್ ಹೈಕಮಾಂಡ್ ಮಂಗಳವಾರ ಮೇ 26ರಂದು ದೆಹಲಿಗೆ ಬರುವಂತೆ ಸೂಚನೆ ನೀಡಿದೆ. ಅಂದು ರಾಹುಲ್ ಗಾಂಧಿ ಅವರನ್ನು ಭೇಟಿ ಮಾಡಲಿದ್ದಾರೆ.

ಮೇಲ್ನೋಟಕ್ಕೆ ರಾಜ್ಯಸಭಾ ಚುನಾವಣೆ ಚರ್ಚೆಗಾಗಿ ಎಂದು ಹೇಳಲಾಗುತ್ತಿದ್ದರೂ, ಪಂಚ ರಾಜ್ಯಗಳ ಚುನಾವಣೆ ಮುಗಿದ ಬಳಿಕ ನಾಯಕತ್ವ ಮತ್ತು ಸಂಪುಟ ಪುನರ್‌ರಚನೆ ಬಗ್ಗೆ ನೋಡಿಕೊಳ್ಳುವುದಾಗಿ ಹೈಕಮಾಂಡ್ ನೀಡಿದ್ದ ಭರವಸೆ ಈಗ ನಿರ್ಧಾರ ಹಂತ ತಲುಪಿದಂತೆ ಕಾಣುತ್ತಿದೆ. ಉಭಯ ನಾಯಕರಿಗೆ ಏಕಕಾಲದಲ್ಲಿ ಬುಲಾವ್ ಬಂದಿರುವ ಕಾರಣ ಕಾರ್ಯಕರ್ತರಲ್ಲಿ ಕುತೂಹಲ ಹೆಚ್ಚಾಗಿದೆ.

ಡಿಕೆಶಿ ಅವರು ಮಾಧ್ಯಮಗಳ ಮುಂದೆ ಇದು ರಾಜ್ಯಸಭಾ ಚುನಾವಣೆ ಕುರಿತ ಮಾತುಕತೆ ಮಾತ್ರ ಎಂದು ಸ್ಪಷ್ಟಪಡಿಸಿದ್ದಾರೆ. ಆದರೆ ರಾಜ್ಯ ರಾಜಕೀಯ ವಲಯ ಮೇ 26ರ ದೆಹಲಿ ಭೇಟಿಯ ಫಲಿತಾಂಶವನ್ನು ಎದುರು ನೋಡುತ್ತಿದೆ.